गर्भाशय मुखाच्या कर्करोगाविरुद्ध ‘सुरक्षा कवच’ १४ वर्षाच्या मुलींना मोफत लस
'एचपीव्ही' लसीकरण मोहिमेचा एल्गार
लोकशाही न्युज,गडचिरोली, (दि.७ मार्च)
जिल्ह्यातील १४ वर्षांवरील मुलींचे भविष्य सुरक्षित आणि आरोग्यदायी करण्याच्या उद्देशाने, जिल्हा प्रशासनामार्फत ‘एचपीव्ही’ (HPV) लसीकरण मोहिमेला गती देण्यात येत आहे. महिलांमधील गर्भाशय मुखाच्या कर्करोगाचे (Cervical Cancer) वाढते प्रमाण ही चिंतेची बाब असून, त्यावर प्रभावी उपाय म्हणून ही मोहीम राबविली जात आहे. या मोहिमेत जिल्ह्यातील सर्व शासकीय विभागांनी समन्वय राखून सहकार्य करावे, असे आवाहन जिल्हाधिकारी अविश्यांत पंडा यांनी केले आहे.
प्रशासकीय समन्वय आणि विभागांची भूमिका
!!
जिल्हाधिकाऱ्यांनी स्पष्ट केले की, ही केवळ आरोग्य विभागाची मोहीम नसून एक सामाजिक चळवळ आहे. यासाठी:
शिक्षण विभाग: शाळांमधील १४ वर्षांच्या मुलींची यादी तयार करून पालकांचे प्रबोधन करावे.
महिला व बालविकास विभाग: अंगणवाडी सेविकांमार्फत गावपातळीवर किशोरवयीन मुलींपर्यंत या लसीचा संदेश पोहचवावा.
नगरपालिका व ग्रामपंचायत प्रशासन: स्थानिक स्तरावर दवंडी आणि बॅनर्सच्या माध्यमातून जनजागृती करावी.
जिल्हाधिकाऱ्यांचे जनतेला आवाहन
या मोहिमेबाबत माहिती देताना जिल्हाधिकारी म्हणाले, “गर्भाशय मुखाचा कर्करोग हा वेळेत लस घेतल्यास पूर्णपणे टाळता येण्यासारखा आजार आहे. ही लस जगभरात प्रमाणित असून ९३% ते १००% प्रभावी आहे. काही समाजकंटकांकडून पसरवल्या जाणाऱ्या अफवांवर पालकांनी अजिबात विश्वास ठेवू नये. ही लस पूर्णपणे सुरक्षित असून यामुळे मुलींच्या भविष्यातील आरोग्याचे रक्षण होणार आहे.”
मोहिमेची महत्त्वाची वैशिष्ट्ये
!!!
पात्रता: ज्या मुलींचे वय १४ वर्षे पूर्ण आहे परंतु १५ वर्षांपेक्षा कमी आहे.
लस मोफत उपलब्ध: जिल्ह्यातील सर्व प्राथमिक आरोग्य केंद्र, उपकेंद्र आणि शासकीय रुग्णालयांमध्ये ही लस मोफत दिली जाणार आहे.
नोंदणी
!!
पालकांनी आपल्या मुलीचे नाव ‘U-WIN’ पोर्टलवर नोंदवावे किंवा जवळच्या आशा स्वयंसेविका/एएनएम यांच्याशी संपर्क साधावा.
आरोग्य विभागाची सज्जता
!!
जिल्हा परिषदेचे मुख्य कार्यकारी अधिकारी सुहास गाडे यांच्या नेतृत्वाखाली आरोग्य विभागाने सूक्ष्म नियोजन केले आहे. जिल्ह्यातील सर्व वैद्यकीय अधिकारी आणि कर्मचाऱ्यांचे प्रशिक्षण पूर्ण झाले असून, दुर्गम भागातील एकही मुलगी या सुरक्षा कवचापासून वंचित राहणार नाही याची दक्षता घेण्याच्या सूचना जिल्हाधिकाऱ्यांनी दिल्या आहेत.
“आपल्या मुलीचे आरोग्य हीच जिल्ह्याची खरी संपत्ती आहे. चला, या मोहिमेत सहभागी होऊन अभियान यशस्वी करूया ,” असे आवाहन जिल्हाधिकारी अविश्यांत पंडा यांनी केले आहे.
