लोकशाही न्युज,अहेरी,(दि,३ ऑगष्ट)
तीन हिस्सेदारांच्या नावाने जमिनीचा फेरफार करुन त्यांची नावे सातबारावर नोंद करण्यासाठी संबंधित इसमाकडून ६ हजार रुपयांची लाच स्वीकारताना लाचलुचपत प्रतिबंधक विभागाच्या अधिकाऱ्यांनी आज अहेरी तालुक्यातील महागाव साजाचा तलाठी व्यंकटेश सांबय्या जल्लेवार (४०) व खमनचेरु येथील मंडळ अधिकारी भूषण रामभाऊ जवंजाळकर (३८) यांना रंगेहाथ पैसे घेतांना अटक केली आहे.
तक्रारदाराला तीन व्यक्तींच्या नावाने असलेल्या जमिनीचा फेरफार करुन त्यांची नावे सातबारावर नोंद करावयाची होती. त्यासाठी तलाठी व्यंकटेश जल्लेवार याने स्वतः साठी आणि मंडळ अधिकारी भूषण जवंजाळकर याच्यासाठी प्रत्येकी ४ हजार ५०० रुपये याप्रमाणे एकूण ९ हजार रुपयांची लाच मागितली. तडजोडीअंती ते दोघांसाठी प्रत्येकी ३ हजार याप्रमाणे एकूण ६ हजार रुपये स्वीकारण्यास तयार झाले. परंतु लाच देण्याची मुळीच इच्छा नसल्याने तक्रारदाराने लाचलुचपत प्रतिबंधक विभागाकडे तक्रार केली. त्यानंतर या विभागाचे पोलिस उपअधीक्षक चंद्रशेखर ढोले यांच्या नेतृत्वात कर्मचाऱ्यांनी पडताळणी करुन सापळा रचला असता आज दोघांना ६ हजार रुपयांची लाच स्वीकारताना पंचांसमक्ष रंगेहाथ पकडण्यात आले.मंडळ अधिकारी व तलाठी यांच्यावर अहेरी पोलिस ठाण्यात गुन्हा दाखल करण्यात आला आहे. त्यांच्या निवासस्थानाचीही झडती घेण्यात आली.
एसीबीचे पोलिस अधीक्षक राहुल माकणीकर, अपर पोलिस अधीक्षक सचिन कदम, संजय पुरंदरे यांच्या मार्गदर्शनाखाली पोलिस उपअधीक्षक चंद्रशेखर ढोले, पोलिस निरीक्षक शिवाजी राठोड, सहायक फौजदार सुनील पेद्दीवार, हवालदार शंकर डांगे, हवालदार किशोर जौंजारकर, प्रवीण जुमनाके यांनी ही कारवाई केली.
संपर्क साधण्याचे आवाहन
¶¶
शासकीय कामे करीत असताना जर कुठलाही कर्मचारी व अधिकारी आपल्याला पैशाची मागणी करत असेल तर लाचलुचपत प्रतिबंधक विभाग गडचिरोली यांच्याशी संपर्क साधावा असे आवाहन करण्यात आले आहे.
पोलीस उपअधीक्षक, अँटी करप्शन ब्युरो गडचिरोली
दूरध्वनी क्रमांक -०७१२-२९५०२०
टोल फ्री क्रमांक -१०६४
